Վերջին շաբաթների ընթացքում ԱՄՆ Սենատը վեցերորդ անգամ մերժել է երկու կուսակցությունների առաջարկած երկու օրինագծեր, որոնք ուղղված էին ներկայում մասամբ փակված դաշնային կառավարության ֆինանսավորմանը։ Նիստը հեռարձակվել է C-SPAN-ով։
Հանրապետականների մշակած և Ներկայացուցիչների պալատի նախկինում հաստատած օրինագիծը ստացել է Սենատի 54 կողմ , 45 դեմ ձայն։ Դեմոկրատների ներկայացրած օրինագիծը ստացել է 47 կողմ և 52 դեմ ձայն։ Կոնգրեսի վերին պալատում հաստատման համար անհրաժեշտ է առնվազն 60 ձայն։
Սենատորները դեռևս համաձայնության չեն եկել ԱՄՆ դաշնային կառավարության աշխատանքի մասնակի դադարեցման վերաբերյալ։ Այն սկսվել է հոկտեմբերի 1-ի կեսգիշերին՝ ֆինանսավորման պակասի պատճառով։ Դա տեղի է ունեցել այն պատճառով, որ Կոնգրեսում իշխող հանրապետական և ընդդիմադիր դեմոկրատական կուսակցությունների ներկայացուցիչները չեն կարողանում համաձայնության գալ մի շարք ծախսերի, ներառյալ՝ առողջապահության վերաբերյալ։ Նրանք միմյանց մեղադրում են աշխատանքի դադարեցումը հրահրելու և քաղաքական նպատակներով այն երկարաձգելու մեջ։
ԱՄՆ նախագահ Դոնալդ Թրամփը երեքշաբթի հայտարարել է, որ Վաշինգտոնի վարչակազմը կարող է զգալի կրճատումներ և ժամանակավորապես ազատումներ կատարել ամերիկյան գործակալություններում և կրճատել մի շարք կառավարական ծրագրեր՝ կառավարության աշխատանքի դադարեցման պատճառով։ Նա մանրամասներ չի ներկայացրել։ Թրամփը չի բացառել նաև, որ կառավարության ֆինանսավորման վերականգնումից հետո ամերիկյան գործակալությունների որոշ աշխատակիցներ հետին թվով աշխատավարձ չեն ստանա։