Ռուսաստանի եւ Բելառուսի նախագահներ Վլադիմիր Պուտինը եւ Ալեքսանդր Լուկաշենկոն հեռախոսազրույց են ունեցել։ Նրանք քննարկել են հետագա համագործակցության հեռանկարները, ինչպես նաեւ միջազգային հրատապ թեմաներ, տեղեկացրել է «Коммерсант»-ը՝ հղում կատարելով Կրեմլի մամուլի ծառայությանը։
Պուտինը եւ Լուկաշենկոն հատկապես նշել են առաջիկայում պայմանավորվածություններն իրականացնելու անհրաժեշտությունը, որոնց կողմերը հասել են Միութենական պետության Բարձրագույն պետական խորհրդի նիստում։ Այն տեղի է ունեցել փետրվարի 26-ին։
Զրույցի ժամանակ նախագահները քննարկել են նաեւ համագործակցությունն առեւտրատնտեսական եւ ներդրումային ոլորտներում, համատեղ փոխշահավետ նախագծերի իրականացումը։
Միութենական պետության Բարձրագույն պետական խորհրդի նիստը տեղի է ունեցել Կրեմլում։ Հիմնական ուշադրությունը հատկացվել է ինտեգրման զարգացմանը, տնտեսական համագործակցությանը, անվտանգության հարցերին եւ համատեղ ծրագրերի իրականացմանը։ Դրանից առաջ Լուկաշենկոն առերես հանդիպում էր ունեցել Վլադիմիր Պուտինի հետ։